दिनेश ठाकुर
नेपालगन्ज, बाँके ।
बाँके प्रहरीले समाजमा डर, त्रास फैलाउने र अराजकता सिर्जना गर्ने तत्वहरूविरुद्ध कठोर कदम चाल्ने घोषणा गरेको छ। हालै हिन्दुहरूको महान पर्व बडा दशैंको विसर्जनको समयमा नेपालगन्जमा केही उपद्रवी मानसिकताका व्यक्तिहरूले झडप सिर्जना गरेपछि जिल्ला प्रहरी प्रमुखले गुण्डागर्दी सह्य नहुने स्पष्ट पारेका छन्।
बडा दशैंको देवि विसर्जन चलिरहेको बेला नेपालगन्जका दुई फरक स्थानमा केही अराजक तत्वहरूले झडप सिर्जना गरेका थिए। घटनालगत्तै प्रहरीको व्यापक परिचालन र उच्च सतर्कताका कारण स्थिति नियन्त्रणमा लिइएको थियो।
“उपद्रवी मानसिकताका व्यक्तिहरूले यस किसिमको समयलाई दंगा एवं ठूलो भौतिक क्षति पुर्याउने अवसरको रूपमा समेत परिणत गर्न खोजेका थिए। तर, विगत वर्षको भन्दा बढी प्रहरी परिचालन र तत्कालै भएको रेस्पोन्सका कारण गम्भीर दुर्घटना हुन पाएको थिएन।”
झडपपछि बाँके प्रहरी प्रमुख अङुर जिसीले गुण्डागर्दी र समाजलाई आतङ्कित बनाउने कुनै पनि गतिबिधि सह्य नहुने बताएका छन्। उनले समाजमा डर, त्रास फैलाउने गुन्डाहरूप्रति कठोरताका साथ प्रस्तुत हुने प्रतिबद्धता व्यक्त गरेका छन्।
बाँके जिल्लालाई विभिन्न दृष्टिकोणले संवेदनशील क्षेत्र मानिन्छ। विशेषगरी, मानव तस्करी, अवैध तस्करी, अवैध उत्खनन लगायतका गलत गतिविधिहरूले यो जिल्लालाई चुनौती दिइरहेको छ। प्रहरी प्रमुखका अनुसार यस्ता सम्पूर्ण गलत गतिविधिहरूलाई नियन्त्रण गर्नु प्रहरीको प्रमुख दायित्व हो र यसमा कुनै सम्झौता गरिने छैन।
यस घोषणाले बाँकेमा शान्ति, सुरक्षा र अमनचैन कायम राख्न प्रहरी प्रशासन थप सक्रिय भएको सङ्केत गर्दछ।
प्रतिक्रिया