पर्सा, – वीरगञ्ज महानगरका विभिन्न वडामा पानीको चरम अभाव भएपछि सखुवा प्रसौनी गाउँपालिकाले मानवीय सेवाका लागि आफ्नो दमकल (बारुण यन्त्र) प्रयोग गरी निःशुल्क पानी वितरण सुरु गरेको छ।
गाउँपालिका अध्यक्ष जसवन्त यादवका अनुसार, वीरगञ्ज महानगरपालिका वडा नं. १७ अलौँ क्षेत्रमा बारुण यन्त्रको ट्याङ्कीमार्फत पानी आपूर्ति थालिएको हो। पहिलो दिन ६ हजार लिटर पानी एक ट्याङ्करबाट वितरण गरिएको जानकारी दिँदै उहाँले भन्नुभयो, “पानीको अभावमा थोरै राहत होस् भनेर हामीले बारुण यन्त्र सञ्चालनमा ल्याएका हौं।”
यादवले पानी संकटका बेला साधन स्रोतको अधिकतम उपयोग गर्नु अहिलेको आवश्यकता रहेको बताउनुभयो। उहाँले भूगोलको सीमाभन्दा मानवताको भावना ठूलो हुने भन्दै संकट टार्न जहाँ सम्भव हुन्छ त्यहीँबाट सहयोग गर्नु मानव धर्म भएको बताउनुभयो। “जबसम्म अभाव छ, हामी बारुण यन्त्रमार्फत वीरगञ्जमा पानी पुर्याइरहनेछौं,” उहाँले भन्नुभयो।
सखुवा प्रसौनी गाउँपालिकामा रहेको डीप बोरिङबाट पानी भरेर गाउँपालिकाको दमकल प्रयोग गरी वीरगञ्जमा ल्याइएको हो। बुधवारदेखि रानीघाट क्षेत्रमा पनि पानी वितरण हुने अध्यक्ष यादवले जानकारी दिनुभएको छ। अन्य वडाहरूमा पनि क्रमशः आपूर्ति विस्तार गरिँदैछ।
यसैबीच, वीरगञ्ज महानगरपालिकाले पनि आफ्ना विभिन्न वडाहरूमा ट्याङ्करमार्फत पानी वितरणको काम सुरु गरेको छ। लामो समयदेखि चापाकल सुक्न थालेपछि स्थानीयवासी प्यासले पीडित बन्दै आएका छन्।
स्थानीयहरूले सखुवा प्रसौनी गाउँपालिकाको यो कदमलाई “समयमै लिएको प्रभावकारी र सहानुभूतिपूर्ण निर्णय” भन्दै स्वागत गरेका छन्।
प्रतिक्रिया